Fertugsafmæli friðargæsluliðans

Þótt afmælið sé ekki fyrr en eftir fáeina daga ákvað Stefán Gunnarsson, framkvæmdastjóri og fyrrverandi friðargæsluliði (með meiru) að nota tækifærið og halda veisluna sama dag og dóttir hans var fermd. Var þar ekkert hálfkák á ferðinni, fremur en vænta mátti.

Veislutjald var reist sunnan undir húsinu þar sem hljómsveit spilaði fyrir dansi. Þá voru drykkir og fingrafæði í úrvali og flugeldasýning meðal þess sem varð til þess að áreiðanlega vel á annað hundrað gestir skemmtu sér konunglega.
Hér sést afmælisbarnið með "afmælistertuhatt" á höfðinu.

Við Másvatn 29. apríl 2007

Ísinn á Másvatni var kuldalegur yfir að líta þótt veðrið væri fallegt þetta vorkvöld, í miðri "hitabylgju".

Því miður finn ég ekki hitastig veðurstöðvarinnar á Mývatnsheiði þennan dag en um það bil sem þessi mynd var tekin mældist hitinn 12,6°C við skíðalyftuna við Kröflu.

Hins vegar var ekki hægt að aka framhjá þessum tjöldum við Másvatn án þess að taka mynd. Því miður var aðeins símamyndavélin með í för.

Sólsetursmyndin var tekin kl. 21:16.

Fimleikasýning 1. maí 2007

Þann fyrsta maí var haldin fimleikasýning í Skjólbrekku, lokapunkturinn á fimleikanámskeiði vetrarins. Yngri hópurinn sýndi fyrst nokkrar æfingar á dýnu og að því loknu hópatriði með boltum.

Áhorfendur skemmtu sér vel og var augljóst að krökkunum hefur farið heilmikið fram í vetur.

Á efstu myndinni má sjá Helga James (næst) í miðjum kollhnís, á næstu mynd er Inga Freyja í handahlaupi og að lokum eru tvær myndir frá hópatriðinu.

Grímuball í Bárðardal, seinni hluti

Að borðhaldi loknu var skipað í þrjú lið sem kepptu í fáeinum "samkvæmisleikjum", m.a. jurtagreiningu, drykkjagreiningu og "bílaleik".

Um "sveitakeppni" var að ræða, þannig var hvert lið skipað fulltrúum úr hverri sveit en fáum sögum fór af úrslitum.

Eftir "samkvæmiskeppnina" var dansað og áður en haldið var heim á leið var tekið til í salnum og hann þrifinn.

U.þ.b. helmingur gesta tók sér far með rútu frá Fjallasýn RÓ sem undirritaður ók.

Grímuball í Bárðardal, fyrri hluti.

Laugardagskvöldið 14. apríl 2007 var haldið grímuball að Kiðagili í Bárðardal. Gestir (úr Mývatnssveit, Reykjadal og Bárðardal) lögðu til mat á sameiginlegt hlaðborð, sem og drykkjarföng til eigin nota.

Mismikið var lagt í grímubúninga en "úrvalið" var töluvert, allt frá bjórdósum yfir í Bangsímon.

Héraðsmót í "battabolta" 2007

Þann 14. apríl 2007 tóku ungir Mývetningar (lið A, B og C) þátt í héraðsmóti í "battabolta" á Laugum.

Árangur var góður, lið A sigraði og lið B (sem sést á miðmyndinni) fékk brons.

Að mótinu loknu stillti hópurinn sér upp fyrir myndatöku.